José Carlos Paleo naceu no ano 1961 na localidade focense de Forxán. Está casado e ten dous fillos. Estudou Formación Profesional e é empresario desde o ano 1986. Foi un dos socios fundadores da Asociación de Comerciantes, Industriais e Autónomos de Foz, no ano 1988, e nesa primeira xunta directiva ocupou o cargo de tesoureiro. Desde 2010 preside Acia Foz e desde o pasado ano 2014 tamén é o máximo responsable do Centro Comercial Aberto. Ademais foi presidente da comisión de festas de San Lourenzo.
O presidente de Acia/CCA foi primeiro tenente de alcalde desde 1991 a 1995, e concelleiro de Cultura, Servizos Sociais, Mocidade, Tráfico e Consumo. Durante os seus diferentes cargos na vida política municipal José Carlos Paleo formou parte dos equipos que dotaron a Foz de casa de cultura, centro social, oficina municipal de información xuvenil, escola de música e banda municipal. Promoveu a creación de Xuvenfoz, da primeira asociación de xubilados do municipio, das xornadas históricas da Mariña lucense, a publicación de diversos libros, a difusión dos atractivos de Foz en programas de Televisión Española e Televisión de Galicia, así como noutros medios de comunicación. Tamén participou no proxecto para a creación da emisora de radio municipal Radio Foz e colaborou na celebración e dinamización de varias edicións do Carnaval focense, da cabalgata dos Reis Meigos, de diferentes festivais e de numerosas actividades culturais, como representacións teatrais e concertos musicais. Ademais foi un dos creadores da Festa Normanda e da Feira de Mostras Multisectorial.