Llano visitou xunto a responsables de Costas aos xubilados da asociación A Moncloa para darlles a nova. O rexedor explicou que “será un monolito de granito, levará a latitude e a lonxitude, unha rosa dos ventos e algunha lenda. O que imos facer é colocalo no paseo marítimo, nun lugar no que non estorbará para o paso da xente. Chegamos á conclusión de que esa era a mellor situación posible”.
O alcalde de Burela engadiu que “os trámites para a súa instalación xa están en marcha. O que lles contaron os responsables de Costas aos xubilados é que Cabo Burela é un cabo singular e un dos máis saíntes do litoral. Con este monolito queremos render homenaxe a todos os mariñeiros de Burela que empregaban esa referencia para chegar a bo porto”.