Durante a xuntanza mantida este xoves a presidenta transmitiulle o seu interese por un importante número de infraestruturas que vertebran a provincia, entre as que se atopan, entre outras, a autovía de San Cibrao a Barreiros, ou as obras na N-634 e N-642. Candia engadiu que este encontro permitiulle coñecer de primeira man o proceso no que se atopan estas actuacións e o compromiso existente por parte do Ministerio de Fomento con Lugo.
“De xeito coordinado deunos a información ademais de tranquilizarnos xa que hai compromisos claros e decididos para solucionar as actuacións que enumerei, principalmente, ademais das de outras demandas”, explicou a presidenta da Deputación quen engadiu que o Goberno do Estado continúa deste xeito “cumprindo coa provincia de Lugo e o exemplo máis claro vese materializado nas obras que se inauguraron hoxe”.
Candia defendeu que a forma máis correcta de traballar é a da “coordinación entre administracións” ao tempo que agradece a visita da Ministra de Fomento “á casa de todos, á Deputación de Lugo”.