A secretaria xeral da Igualdade reúnese coa alcaldesa de Mondoñedo para analizar as axudas recibidas nos últimos anos

Santiago, 1 de outubro de 2015.- A secretaria xeral da Igualdade, Susana López Abella, mantivo unha xuntanza coa alcaldesa de Mondoñedo, Elena Candia, para analizar as axudas e subvencións que Igualdade concedeu ao Concello dende o ano 2009, que ascenderon a 152.000 euros; na súa maioría, o 94 por cento, para o mantemento do Centro de Información á Muller (CIM).

Con esas axudas tamén se financiaron programas de promoción de Igualdade, concretamente actividades de coeducación, e o primeiro Plan de Igualdade de Oportunidades Municipal (PIOM) do Concello de Mondoñedo.

Susana López Abella valorou moi positivamente que o Concello de Mondoñedo pertenza á Rede de entidades locais contra a violencia de xénero, que actualmente xa conta con 158 concellos galegos adheridos.