Os 9 directores de centros de ensino checos convidados pola Asociación APAGA visitaron a praia das Catedrais

Ribadeo, 12 de outubro de 2015. Os nove directores de centros de ensino checos convidados pola Asociación de Profesores de Automoción de Galicia (APAGA) que actúa como socio de acollida neste proxecto educativo chegaron este domingo a Ribadeo.

Ata o hotel O Cabazo se desprazaron o alcalde, Fernando Suárez, e a concelleira de Turismo, Ana Martínez, para darlles a benvida, desexarlles unha feliz estancia en Ribadeo e para facerlles entrega de diverso material promocional. Nese acto tivo lugar unha actuación coa música tradicional galega coma protagonista.
A delegación checa xa visitou a primeira hora deste luns a praia das Catedrais. Ás 11.00 horas estarán na empresa Recense en A Pontenova; ás 13.00 horas farán unha visita turística por esta localidade; xantarán en Ribadeo e xa pola tarde ás 16.30 horas visitarán a empresa Hermanos Rega en A Seara (Alfoz) e ás 18.00 horas chegarán a Mondoñedo para coñecer a cidade episcopal.

Este martes 13 de outubro visitará os IES María Sarmiento, en Viveiro e Perdouro, en Burela, o IES Foz e o Gamallo Fierros, en Ribadeo. Tamén nesta localidade achegaranse ata a Escola Oficial de Idiomas e á Escola Agraria Pedro Murias.

Esta viaxe enmárcase nos intercambios europeos nos que participan Apaga e centros de ensino doutros países. No pasado curso varios profesores, membros de Apaga, participaron en experiencias similares, a través do programa Aprender a aprender en la formación profesional, e viaxaron a Alemaña, Italia e a República Checa, onde visitaron centros de ensino, empresas, Concellos…

A Asociación de Profesores de Automoción de Galicia, que preside Álvaro Doural, é socio de acollida nesta visita chegada desde a República Checa.