O premio do look gañador absoluto realizará o peche do desfile, pasando o seu deseño, unha vez proclamado como mellor look de deseñador emerxente do concurso Fashion Academy El Corte Inglés 2015; prácticas no departamento de compras de El Corte Inglés durante 6 meses; 3.000 euros nunha tarxeta regalo desta firma; a produción e venda do look en tres tallas (S, M e L) en centros seleccionados de El Corte Inglés en Madrid e o 15% de royalties sobre as vendas da colección.
Carla Méndez García creou un look de dúas pezas principais: una saia de tubo negra clásica, cuberta por unha saia de organdí máis ríxida e voluminosa, e un crop top negro con perlas brancas, “con formas inspiradas no art decó”. No seu perfil en Fashion Academy El Corte Inglés a deseñadora ribadense explica que decidiu crear “un look que me defina a min mesma, de ahí a elección do branco e o negro: o equilibrio. Ambos se complementan, ademais de dar unha elegancia indiscutible a calquera look”. E engade que “este outfit, ao estar composto por tres pezas, clásicas e á vez contemporáneas, da a posibilidade de combinalas entre si, obtendo looks máis o menos arriscados, dependendo de cada personalidade”.
Carla Méndez, con raíces familiares na Pontenova e en Mondoñedo, asegura que se presentou ao concurso tras ver uns folletos informativos na facultade de Belas Artes e despois de escoitar á organización. Esta moza estudante conta que “aínda que estudo Belas Artes, xa desde pequena me gustaba coser e deseñar roupa, de feito fun un tempo a clases de costura e confección en Ribadeo xa fai uns anos. Empecei por facer un boceto para presentalo o antes posible, mentres eu mesma confeccionaba o look. Pedín prestado a un amigo un maniquí de costura, e coa miña máquina de coser púxenme mans a obra. Fun adaptando o meu tempo para facer os traballos da facultade e poder coser eu soa todo o deseño”.
Ademais de elaborar o deseño e a confección, Carla Méndez García tamén se converteu en modelo da súa propia creación: “o tempo para realizar este proxecto foi moi xusto, polo que xa de lanzarme… lanceime de todo. Por iso eu mesma me puxen como modelo para facer as fotos do traxe, e con axuda dunha compañeira organizamos unha sesión de fotografía nas inmediacións do Palacio Real”.
Os que desexen ver o deseño completo de Carla Méndez García e apoiala cos seus votos poden facelo a través do seguinte enlace: http://fashionacademy.fashionacademy.es/#/votes.