Nas categorías inferiores de alevín, en arco recurvo, destacaban os nosos dous representantes. Ángel Galante Briones situábase nas series clasificatorias na primeira posición con 549 puntos. A súa compañeira Beatriz Botelho Melo facía o mesmo no grupo das mozas con 497 puntos; puntuación coa que ademais bate o seu record persoal de 468 puntos obtidos no X Trofeo de Nadal celebrado en Pontevedra o 13/12/2014.
Pola súa banda Beatriz Botelho Melo disputaba a final polo sistema de sets contra Zaira Córdoba López do Club Arco Narón. Nótaselle nerviosa e iso pásalle factura, perdendo o primeiro set. Pero recupérase no segundo, o empatan o terceiro e ponse o marcador 3 a 3, pero Zaira é máis certeira e logra a vantaxe no cuarto set poñendo o marcador 5 a 3 o que obriga a Bea a gañar si ou si o quinto set se quere ir á frecha de desempate. O empate a puntos só beneficiaría a Zaira. Iníciase o quinto set, pero os nervios son a tónica e aínda que consegue Bea estrelar a súa primeira frecha nun dez perfecto, a súa segunda frecha estrélase nun dous tras realizar unha solta da corda de arco mala que ata fai que lle golpee o antebrazo desprazando a frecha ao dous baixo á esquerda. Refaise e crava a súa terceira frecha noutro dez perfecto; pero a súa compañeira non comete erros e aínda que cunha puntuación menos rechamante é máis regular: tres 8 danlle o triunfo e desprazan á arqueira mariñá á segunda posición.
Na categoría senior feminino de arco recurvo, a representante do club, Ana María Briones Montes, finalizaba sexta tralas series clasificatorias; pasando ás eliminatorias. No seu primeiro encontro tócalle contra un óso duro de roer, Marta Guerreiro do Club Arco Muralla de Lugo. O resultado é moi axustado, ambas arqueiras están demostrando a súa valía frecha a frecha; primeiro set para Ana, segundo set para Marta, terceiro set empate, poñendo o marcador 3 a 3 en puntos de set. Ana céntrase e logra a vantaxe no cuarto set e aproveita esta vantaxe no quinto e último set gañándoo, e logrando con iso o pase a semifinais.
O seguinte encontro é contra Selene Blanco de Arqueros de Cambre (A Coruña) e segunda nas series clasificatorias. Selene fai valer a súa posición e rompe a ilusión da arqueira mariñá cun contundente 6 a 0 en puntos de set. Xa só pode optar á terceira posición. O terceiro encontro é cunha vella coñecida María Luisa Fernández do Club Arco Narón. O primeiro set gáñao Ana, o segundo é para María Luisa, o terceiro e o cuarto ambas empatan o que pon o marcador 4 a 4; pero o quinto set é para Ana e con el, o terceiro posto.
Na categoría Senior masculino, participaban José Manuel García Cordido, que lograba situarse na praza novena das series clasificatorias con 499 puntos. Puntos que lle valerían para bater o seu record persoal de 479 puntos conseguidos no XVI Trofeo de As Pontes o pasado 11/1/2015. Francisco Botelho Melo con 492 puntos conseguía a posición decimo primeira e Jorge Galante a décimo cuarta con 470 puntos. Os tres arqueros entraban nas series eliminatorias en 1/8 de final perdendo ante os seus contrincantes por 6 a 0.
O resto dos arqueiros do club non lograba colarse nas eliminatorias. Iván Cendán Lindin conseguía bater o seu record persoal conseguido en outubro do 2014 no IX Trofeo Arcobarco (O Barco de Valdeorras-Ourense) onde situaba a súa marca nos 365 puntos; agora superada en catro puntos. David Pernas Basanta e Lucas Rouco López, na súa primeira participación ante a diana tripla vertical, lograban situarse no posto 21º con 449 puntos e 28º con 405 puntos respectivamente.
Gabriel Galante retirábase da competición, sen finalizar a primeira serie de clasificación ao lesionarse as costas.
Liga de equipos
Agora queda por diante o segundo encontro da liga de equipos. No primeiro, o IADOVI A composto por Ana Briones, Gabriel e Ángel Galante situábanse no primeiro posto do Grupo 1; mentres que o IADOVI B composto por Iván Cendán, David Pernas, Lucas Rouco e José Antonio Rico situábanse na sexta posición do grupo 2.