Esta entidade ten como fin a investigación, o estudo, a conservación, a defensa e a difusión da Cultura Galega, especialmente no que se refire á lingua, á historia e ás súas tradicións en xeral, e da Terra Chá en particular. Como non podía ser menos, o seu interese tamén se había de fixar no Camiño Norte, hai pouco recoñecido como patrimonio cultural da humanidade, e que abre as súas portas en Galiza no noso concello de Ribadeo.
A exposición ten un claro compoñente visual acompañado de breves textos explicativos que nos introducen no patrimonio etnográfico, arquitectónico e artístico que peregrinos, e visitantes en xeral, podemos contemplar percorrendo as sendas xacobeas. Cun breve paseo polas dependencias da OMIC, ao abeiro de séculos de historia, poderemos repasar as principais achegas do Camiño Norte desde este 4 de decembro e ata o 11 de xaneiro en horario de atención ao público en Turismo.