Suárez Barcia contou que “a primeira hora desta mañá decidimos poñer fin, e espero que sexa definitivo, a esta situación que padecemos dende hai tempo, dado que hai unha persoa que ten un síndrome de Dióxenes, aínda que legalmente é unha persoa capacitada e dona dos seus propios actos, e consideramos que non está nunha situación adecuada de salubridade pública, tal e como vive aquí na entrada de Ribadeo. Para iso, hai uns días, dirixímonos a Saúde Pública da Xunta de Galicia para que nos botaran unha man no sentido de como actuar. Saúde Pública determina que o lugar onde vive, o seu entorno e a acumulación de lixo fai que sexa un perigo de saúde pública, polo que a primeira hora, o persoal do Concello de limpeza viaria, obras, servizos sociais, policía local xunto coa concelleira de Servizos Sociais e o alcalde, estivemos alí intentando dialogar con esta persoa, que ademais é afable e boa persoa, pero non se dá conta do mundo en que vive, rexeita todo tipo de axuda sistemática que lle ofrece o Concello, un teito, comida quente, un lugar onde durmir”.
O alcalde de Ribadeo subliñou que “sen ningún problema, de mil amores llo ofrecemos sistematicamente e el rexéitao, pero a situación de como vive chega un momento no que afecta aos demais e non podemos aceptar iso. Coa maior dignidade e respecto posible á súa persoa libramos esta cantidade de lixo impresionante, que ocupou practicamente dous camións de lixo municipais e, ademais, trasladamos a un punto municipal o resto de animais que aínda tiña na súa compañía. Farémonos cargo transitoriamente deles”.
E engadiu: “démoslle de prazo unha semana para eliminar o resto de pertenzas persoais del e, se non é así, procederemos para a semana que vén a eliminar o resto. Confío en que esta persoa, que ten un bo trato e un bo talante, entre en razón, porque nos estamos enfrontando a un perigo de salubridade pública e iso si que non o podemos autorizar, gústelle ou non lle guste”.
O alcalde asinou unha resolución para coordinar todo o operativo posto en marcha no día de hoxe e na que se acorda “o traslado desta resolución ao xulgado correspondente, á fiscalía de Mondoñedo, á xefatura de Sanidade, aos Servizos Sociais municipais, ao Servizos de Obras e Limpeza Viaria, así como á Policía Local, e con entrega de copia ao propio interesado-afectado”.
Na resolución da Alcaldía recólleseque “se teñen feito varias intervencións con esta persoa, encamiñadas a conseguir a mellora das súas condicións de vida. Dado que sempre rexeitou recibir axudas públicas, xestionouse, a través da fiscalía o ingreso para unha valoración psiquiátrica no hospital de Burela ao tempo que se iniciou un expediente para promover a súa incapacitación, si houbera lugar. A conclusión do internamento foi a seguinte: No patología psiquiátrica aguda. Probable trastorno de personalidad. El paciente tiene conservadas sus funciones congnitiva, intelectiva y volitiva, tiene capacidad de juicio conservada y en el momento actual es consciente de su situación vital. A continuación e de acordo con este criterio a fiscalía de Mondoñedo decreta o peche das dilixencias procesais abertas pola fiscalía provincial de Lugo por non resultar procedente neste momento a interposición de demanda de declaración de incapacidade total ou parcial”.