Madrid, 28 de xaneiro de 2016.- A Consulta Preliminar do Mercado atópase na súa fase final de identificación de solucións innovadoras contra a néboa densa que se produce no tramo da autovía A-8 entre Mondoñedo e A Xesta, na contorna do Alto do Fiouco.
Este xoves, 28 de xaneiro, tivo lugar a cuarta xornada informativa no Ministerio de Fomento coas empresas, universidades e interesados. Trátase da última xornada antes de concluír a Consulta, debido ao suficiente grao de avance das propostas recibidas e ao cumprimento dos requisitos de participación e idoneidade establecidos para o seu peche.
O Ministerio de Fomento reuniuse con preto de 40 persoas, pertencentes a un total de 17 empresas do eido das infraestruturas e da I+D, e representantes de 6 organizacións e universidades relacionadas co sector.
Ata o momento, 22 participantes rexistraron as súas propostas de acordo ao procedemento. No entanto, o prazo segue aberto para que os participantes interesados poidan presentar as súas propostas ou completar e actualizar as xa entregadas, antes de que se produza o peche da Consulta, que será próximamente anunciado no Boletín Oficial do Estado.
Os resultados da Consulta permitirán concretar as prescripcións técnicas e administrativas para o desenvolvemento e experimentación con prototipos en campo, no marco da Compra Pública Innovadora, de cara á futura contratación de prototipos dos sistemas de protección antinéboa que se licitará en 2016.