No concerto solidario da Banda Municipal de Ribadeo recadáronse 810 euros para as persoas con mobilidade reducida da asociación A Mariña-Cogami

Ribadeo, 4 de xaneiro de 2016.- No concerto solidario organizado pola asociación Amadores da Música, que correu a cargo da Banda Municipal de Ribadeo e que se celebrou este domingo no Teatro ribadense, recadáronse 810 euros para as persoas con mobilidade reducida da Asociación de Persoas con Discapacidade da Mariña Lucense-Cogami.

Antes de empezar a actuación da Banda, a presidenta da asociación beneficiaria, Emma Camaño García, e outros dous membros do colectivo agradeceron a iniciativa de Amadores da Música e a presenza do público asistente.

A Banda Municipal de Música de Ribadeo, dirixida por David Ballester Martínez, interpretou as pezas Jupiter Hymn, No lo olvido, Adagio veneziano, Amparito Roca, The Beatles in concert, New York, New York e Queen in concert.

O próximo concerto que ten previsto ofrecer na vila ribadense a Banda Municipal de Música de Ribadeo será o de Semana Santa, que está programado para o 20 de marzo, domingo, ás 20:30 horas no Teatro.