Alfonso Villares, acompañado por outros membros do goberno municipal, compareceu hoxe en rolda de prensa “ante as noticias que apareceron esta semana respecto ao Museo do Mar e concretamente unhas declaracións do portavoz do BNG na Deputación nas que dicía que Concello, Xunta e Deputación nos tíñamos que poñer de acordo para ampliar o Museo do Mar”. E explicou que “desde o Concello de Cervo en primeiro lugar temos que pedirlle ao BNG provincial e ao local que se poñan de acordo, porque eu creo que ese é un paso importante a dar antes de que nosoutros, desde o Concello, continuemos tamén avanzando no camiño que creo que temos que seguir todos para adquirir estes terreos co fin de ampliar o Museo do Mar. E digo que terían eles que dar ese paso porque o que di o BNG provincial non ten nada que ver co que dixo e di o BNG aquí, en Cervo, pois no ano 2005 aprobouse unha moción proposta polo Bloque que dicía: o grupo municipal do BNG insta á corporación municipal a dirixirse á Deputación Provincial para que merque o quinteiro comprendido entre a rúa do Torno, o paseo marítimo e a avenida da Mariña, en San Cibrao (Cervo), que é o terreo onde se quere ampliar o Museo do Mar. O grupo municipal do BNG tamén instaba neste acordo a dar traslado á Deputación e ás persoas e entidades interesadas. Este acordo foi aprobado por unanimidade, pero a proposta do BNG; polo tanto o Bloque tiña claro e ten claro, parece ser, que é a Deputación que ten que comprar estes terreos e así o aprobamos todos por unanimidade. Pero á vista das declaracións feitas recentemente parece ser que o BNG provincial di unha cousa distinta. Por tanto o que lles pedimos para seguir dando pasos é que aclaren a súa postura: se vai ser a do BNG provincial ou a do local a que se teña en conta. Obviamente a mellor opción para os intereses dos veciños de Cervo é que eses terreos sexan comprados integramente pola Deputación. Unha vez que aclaremos isto nós, desde o Concello, seguiremos adiante á hora de intentar coas conversas necesarias coa Deputación Provincial, porque foi a quen non diriximos ata agora, a adquisición destes terreos para poder posteriormente ampliar o Museo do Mar”.
O alcalde engadiu que “houbo outras declaracións que tamén me gustaría aclarar, con respecto á paralización do Plan Xeral e á protección do museo, porque non son certas e quen fixo estas manifestacións sabe perfectamente que cando se produciu a paralizacións das licenzas nese quinteiro, e tamén foi a instancias do BNG e tamén foi aprobado por unanimidade por toda a corporación de Cervo, posteriormente por parte da Xunta de Galicia, gobernada polo bipartito de PSOE e BNG, no ano 2007 se nos dixo que había que explicar claramente en que se sustentaba economicamente esa suspensión, porque por moito que paralizásemos as licenzas, e así intentamos facer para poñer esa zona como dotacional, a Xunta do goberno bipartito obrigábanos a dicir quen ía sufragar os gastos, porque a propia administración autonómica entendía que a persoa propietaria destes terreos ten uns dereitos adquiridos e tiña que facerse cargo deles algunha administración. Foi polo que nos diriximos á Deputación, pero nunca nos dixeron que eles directamente ían adquirir estes terreos nin tan sequera se comprometeron por escrito a levar a cabo un proceso de expropiación da parcela para que esa modificación puidera facerse. Polo tanto isto é algo que hai que corrixir con respecto ás declaracións do BNG nas que dicía que o feito de ter aprobado o Plan Xeral ía protexer o museo, cousa que non se puido levar a cabo polas esixencias da Xunta bipartita e pola falta de compromiso da Deputación; e realmente eles tíñano que saber. Entón pídolle ao BNG que diga as cousas como son, que non diga incertezas, pois a modificación non se levou adiante pola petición do goberno bipartito da Xunta dun informe económico, que lle solicitamos á Deputación, pero esta nunca se pronunciou comprometéndose á compra do terreo”.
Villares comentou ademais que o estudo de detalle para esa parcela “tivemos que aprobalo por responsabilidade, porque así o dicían todos os informes que eran vinculantes para facelo. E tamén dixemos que esta sentenza, polo recurso formulado pola Deputación Provincial, que tumba este estudo de detalle nosoutros vémola favorable e por iso non vamos recorrela”.