“Chegar á final é un obxectivo claro do equipo e do club. Queremos traer a nosa primeira Copa Galicia este ano para Burela” explicaba o técnico laranxa, Daniel Ibañes, incidindo na ilusión que teñen depositada xogadores e corpo técnico na competición. O adestrador fai un chamamento á concentración ante un rival que os agarda moi motivado: “Unha eliminatoria a un só partido sempre pon as cousas ao 50%, será complicado e nesta ocasión aínda será máis difícil; medirémonos a un rival que non o está pasando ben na liga e que quererá conseguir o premio da final da Copa ante a súa afección”.
Daniel Ibañes poderá dispoñer de todo o vestiario a excepción de Mata e Iago Míguez, en proceso de recuperación das súas respectivas lesións. Carlitos, ausente en Jumilla por unha artitre nun pé, volveu onte aos adestramentos.
O outro candidato ao título irmandiño sairá do envite entre A Estrada Inversia FS, de Terceira, e Santiago Futsal, compañeiro de batallas dos laranxas en Primeira, que se verán as caras o 9 de marzo.