O CEIP Plurilingüe da Pontenova e o IES Plurilingüe San Rosendo de Mondoñedo foron seleccionados pola Consellería de Cultura, Educación e Ordenación Universitaria para desenvolver actividades de inmersión lingüística en lingua inglesa.
O Diario Oficial de Galicia publica este venres a resolución pola que se resolve a convocatoria e selección de centros para participar nunhas estadías dirixidas a alumnado de sexto curso de educación primaria e a todas as etapas de educación secundaria obrigatoria.
O obxectivo destas actividades de formación é que o alumnado desenvolva nun contorno real a súa comunicación en inglés, complementando esta formación con actividades de carácter cultural e lúdico, co fin de estimular a práctica do idioma e a súa utilización en contextos comunicativos máis amplos que os que permite o ámbito escolar. Para conseguir o maior rendemento posible da estadía, o profesorado será nativo en lingua inglesa.
A convocatoria enmárcase no Plan de Potenciación das Linguas Estranxeiras da Consellería de Cultura e Educación, e contribúe a desestacionalizar e ampliar fóra do verán este tipo de actividades de formación en idiomas.