Ambas as escuadras apostaron por saír á pista de arriscar en exceso, sendo cautos en ataque e coidadosos co manexo do esférico, esperando un desaxuste na circulación rival. Co paso dos minutos, o Burela FS Pescados Rubén gañou en solvencia. Despois de senllas oportunidades de Iago Míguez e Quintela en ambas filas foi outro Iago, Rodríguez, o que estreou o luminoso e adiantou os laranxas no minuto 16 en contraataque despois dunha ocasión do propio Quintela. Pouco despois , en aposta colectiva, Míguez , moi incisivo baixo os paus composteláns, anotou o segundo dos da Mariña.
Non lles sentou demasiado ben o descanso aos laranxas, que en tan só tres minutos viron como os composteláns igualaban a contenda, con dobrete de Dani Montes, primeiro cun potente disparo ante Edu e despois aproveitando un rexeite a tentativa de Catela; antes Íker desbaratara co peito o posible 3-1 de Chino. Nos seguintes compases ambas as porterías volveron alternar protagonismo; a madeira compostelá impediu no 24 unha nova vantaxe do Pescados Rubén con Iago Míguez e no 25 o sempre inspirado Edu executou a gran parada do encontró fronte a Álex Diz. Antes de chegar ao ecuador da segunda parte, o lanzamento envelenado de Chino, en media altura, volveu petar con Íker; o meta compostelán sacou outra man prodixiosa no 36 fronte a Iago Rodríguez. Edu tampouco fraqueou na defensa da rede laranxa ante Álex Diz (34) e Pablo Tallón (38). O Fontes do Sar viviu unha recta final de alta voltaxe cos dous equipos saturados de faltas que mantivo o empate e conduciu á prórroga; os da Mariña non puideron superar o muro de Íker, non aproveitaron o salvoconducto do dobre penalti no 38 nin tampouco no último segundo cun gran perigo de Petry.
Co tempo extra, o Burela FS cometeu a sexta falta e o Santiago viu a ocasión idónea e materializou o 2-3, con dobre penalti de Dani Montes (minuto 43). Responderon os de Daniel Ibañes con xogo de cinco para facerse co galardón irmandiño sen o resultado merecido. Os 5 minutos remataron con dianas de Diego Quintela e Santi no definitivo 2-5.
Ficha técnica
CD Burela FS Pescados Rubén: Edu, Isi, Chano, Carlitos, Chino,cinco inicial; tamén xogaron Antoñito, Petry, Iago Míguez, Iago Rodríguez, Álex
Santiago Futsal: Íker, Hugo, Pablo Mel, Diego Quintela, Dani Montes, cinco inicial; tamén xogaron Iván Rumbo, Antonio Diz, Pablo Tallón, Santi, Catela, Álex Diz
Goles: 1-0, minuto 16, Iago Rodríguez; 2-0, minuto 18, Iago Míguez; 2-1, minuto 21, Dani Montes; 2-2, minuto 23, Dani Montes; 2-3, minuto 43, Dani Montes (d.p.); 2-4, minuto 43, Diego Quintela; 2-5, minuto 44, Santi
Amoestacións: Por Burela FS, amarela a Carlitos (minuto 23), Álex (minuto 27), Chano (minuto 37), Iago Rodríguez (minuto 38). Por Santiago amarela a Iván Rumbo (minuto 5), Dani Montes (minuto 7), Quintela (minuto 37), Álex Diz (minuto 38)
Incidencias: Partido correspondente á final da Copa Galicia (FGFS) disputado no pavillón Fontes do Sar de Santiago de Compostela. Minuto de silencio en homenaxe ás vítimas dos atentandos de Bruxelas