Ribadeo, 23 de marzo de 2016. As instalacións de Pádel Club Ribadeo acollen a cuarta edición do Open de Semana Santa, que nesta ocasión leva o nome de Logo Design Studio, como patrocinador principal do torneo. Os partidos comezarán a disputarse este xoves, ás 18.00 horas e desenvolveranse ata o domingo 27, xornada na que durante a tarde disputaranse as finais.
O campionato contará coa participación de 168 xogadores en cinco categorías: primeira, segunda e terceira masculina; feminina e mixta. Na primeira masculina hai un premio de 250 euros para o campión e de 150 euros para o subcampión. Para as outras catro modalidades os premios consistirán en material deportivo. Ademais, haberá sorteo de agasallos para os participantes.
A asistencia de público aos partidos é libre e gratuita.