Pilar Armada destacou que “o número de participantes incrementouse ata chegar a máis de 700, polo que foi necesario retirar canastras e outros aparellos deportivos no pavillón da Veiga para que poida acoller a tanta xente, que virá palillar desde lugares como Gijón, a Costa da Morte, Xove, Burela, Ferrol, Begonte, Mieres, La Felguera, Ourense, Navia, Cedeira, A Coruña, Lugo, Carmariñas e, por suposto, de San Ciprián”.
En canto á carpa anexa ao pavillón para a venda de produtos de artesanía de labores, a edil de Igualdade comentou que “estará tamén a tope, porque haberá 43 postos que veñen desde Cantabria, Galicia, Asturias e Valencia. Tivemos peticións para instalar máis, pero non foi posible polo que lles pedimos desculpas aos que quedaron fóra nesta ocasión”.
Pilar Armada tamén anunciou que “a novidade este ano é a exhibición do proceso do liño a cargo de mulleres de San Bartolomeu de Insua, en Vilalba, que vai estar moi ben, e contaremos coa animación musical do grupo folclórico Airiños do Xunco. Ademais, como en edicións anteriores, as palilleiras visitarán a fábrica cerámica de Sargadelos, para o cal o Concello pon a súa disposición autobuses”.
A concelleira salientou que como consecuencia deste evento “a hostalería do municipio e dos concellos máis próximos a Cervo, como Xove e Burela, verase moi beneficiada pola gran cantidade de xente que atrae este encontro, porque ademais das palilleiras tamén virán acompañantes e visitantes”.