O Sergas está xa a ultimar os derradeiros trámites e a realización das probas para iniciar a actividade do Servizo de Radioterapia do Hospital Universitario Lucus Augusti, que foi dotado cun acelerador lineal de última xeración.
O novo acelerador lineal de electróns do HULA dotará a este centro dunha das tecnoloxías para o tratamento do cancro máis avanzadas que existen actualmente no mercado sanitario. O acelerador lineal de Varian, modelo Clinic, foi instalado nun dos dous búnkers que se habilitaron para este efecto na Unidade de Oncoloxía Radioterápica do Hospital Universitario Lucus Augusti, e forma parte do equipamento tecnolóxico de última xeración financiado pola Fundación Amancio Ortega, a través do convenio de colaboración co Servizo Galego de Saúde.
A súa gran rapidez e precisión na administración das doses de radiación, xunto cos seus mecanismos de seguridade, e os avanzados sistemas de imaxe e compoñentes robotizados dos que vai dotado, convérteno nunha das tecnoloxías máis punteiras contra o cancro. A combinación das súas principais cualidades, rapidez e precisión, permiten tratar os cancros con gran efectividade e seguridade, preservando ao máximo os órganos e zonas sas que os circundan. Ademais, en determinadas patoloxías, os tratamentos vanse beneficiar dunha redución notable na súa duración, o que supón importantes beneficios para o paciente.
Entrará en funcionamento en breve
Tralo proceso de formación dos profesionais que van traballar neste servizo, o HULA poderá atender, en breve, aos primeiros pacientes a tratamento con radioterapia. Segundo os cálculos iniciais do Sergas, a nova área de oncoloxía radioterápica do Hospital Lucus Augusti atenderá a máis de 600 pacientes cada ano.
O Servizo de Radioterapia do Hospital Universitario Lucus Augusti ocupa unha superficie de máis de 1.700 metros cadrados, nos que se inclúen os dous búnkeres cos que contará o servizo (o HULA será dotado nos vindeiros meses cun segundo acelerador lineal), así como salas de consultas, unha sala cun TAC para uso exclusivo deste servizo, salas de espera e zona de citación, entre outros espazos.
A posta en marcha deste novo servizo hospitalario, que completa a ampla carteira de prestacións do hospital lucense, implicou o incremento do cadro de persoal do centro. Neste servizo traballarán dous facultativos especialistas en radiofísica, dous especialistas en oncoloxía radioterápica, un enfermeiro especialista en radioterapia, catro técnicos especialistas en radioterapia, un técnico en coidados de enfermería e outro persoal, como administrativos e celadores.
O Servizo de Radioterapia atópase emprazado fronte ao Servizo de Medicina Nuclear, que tamén dispón de 1.600 metros cadrados, o que fai que entre os dous sumen preto de 3.400 metros cadrados dispoñibles. Ámbalas dúas áreas están preparadas para a súa entrada en funcionamento unha vez se culminen todos os trámites necesarios para poder tratar os primeiros pacientes con absoluta calidade e seguridade.
A posta en marcha destes dous servizos posibilitará que, determinados procesos diagnósticos e terapéuticos, podan realizarse no Hospital de Lugo, nas mesmas condicións que se facían ata agora noutros hospitais. Deste xeito, mellorarase substancialmente a atención sanitaria que se presta aos cidadáns, poranse a disposición dos profesionais da saúde as últimas tecnoloxías diagnósticas e terapéuticas, e incrementarse a produtividade e a capacidade diagnóstica dun hospital de vangarda como o Hospital Universitario Lucus Augusti.