Os sendeiristas de Terras de Lourenzá e de Pasada das Cabras de Burela continúan facendo o Camiño Norte. Este sábado 9 de abril 80 camiñantes cubrían a 4ª etapa de aproximadamente 16 km e que transcorre entre as poboacións de Lousada-Abadín e Martiñán a través das que puideron ver a ermida de San Cosme da Montaña, os pobos de Gontán e Abadín ou cruzar a Pontevella de Martiñán que salva o río Batán ata rematar en Martiñán. Á volta, repuxeron forzas no restaurante Montero de Mondoñedo. Pasada das Cabras declárase asociación deportiva e cultural e ecoloxista. Por iso, denuncian o trato cruel que sofren os animais; xa que, durante a ruta, atoparon “vergoñentos cepos nas patas de cabalos para mantelos controlados nos cercados”. A próxima etapa será o 7 de maio entre as poboacións de Martiñán-Vilalba e Puente Rodríguez.
