Un dos asuntos abordados no encontro foi as obras de prevención dos incendios forestais que se acometerán na comarca este ano e que se centrarán basicamente no acondicionamento de pistas e no desbroce e mellora das áreas cortalumes.
As actuacións nesta primeira fase, ás que a Consellería de Medio Rural destinará preto de 168.000 euros, xa saíron a concurso e, segundo indicou a delegada, prevese que estean adxudicadas a finais deste mes. Aínda que as obras afectarán a cinco concellos mariñáns, será o de Viveiro o que acapare a meirande parte do orzamento. A delegada incidiu no traballo que realizan durante todo o ano as brigadas de medio rural nesta comarca, centradas fundamentalmente en desbroces, podas e melloras de pistas, que dende o ano 2009 supuxeron un investimento de 1,5 millóns de euros.
Galicia é a primeira potencia forestal do Estado e a novena no ámbito europeo. E, consciente desa fortaleza, a consellería incrementou os fondos dedicados ó monte para, ademais de previr os efectos dos incendios, fomentar a silvicultura; a comercialización de produtos forestais; a reforestación e a creación de superficies forestais; ou a constitución de Sociedades de Fomento Forestal (Sofor).
“Con respecto ao pasado exercicio, de feito, a Xunta duplicou o investimento produtivo no monte, ao pasar de case 25 millóns a preto de 51 millóns, para fundamentalmente fomentar a xestión sustentable, a agrupación de propietarios ou o impulso do uso da biomasa con fins enerxéticos, entre outros obxectivos”, salientou a delegada da Xunta.
Neste contexto Arias puxo en valor, por exemplo, que o pasado ano a Consellería de Medio Rural realizou tratamentos silvícolas (rozas, podas e rareos basicamente) para a prevención de lumes en 450 hectáreas de montes veciñais e man común da Mariña. Máis do 60 por cento desta superficie corresponde ao concello de Viveiro.
Estes traballos supuxeron máis de 325.000 euros de investimento. A este mesmo cometido dedicaranse este ano máis de dous millóns de euros en toda a provincia.
A delegada territorial referiuse tamén á importancia que para “a mellora das condicións de vida dos residentes nas áreas rurais” ten o Plan marco de mellora de camiños municipais de acceso a explotacións agrarias. Unha iniciativa, cofinanciada con fondos Feader, que suporá neste exercicio un investimento de máis de 1,6 millóns de euros para os concellos mariñáns, que representa o 30 por cento do previsto para toda a provincia.
Raquel Arias indicou que as novidades introducidas no plan este ano redundarán nun maior beneficio para os concellos e por extensión para os cidadáns, e salientou que os criterios do reparto de fondos foron consensuados entre a Axencia Galega de Desenvolvemento Rural (Agader) e a Federación Galega de Municipios e Provincias (Fegamp).