José Ramón Soto explicou que “o vicepresidente da Xunta de Galicia, Alfonso Rueda Valenzuela, xunto co director xeral de Emerxencias da Academia Galega de Seguridade Pública, Luis Menor Pérez, fixeron entrega ao Concello de Cervo de tres traxes completos para combater a praga das avespas velutinas. Por parte do Concello de Cervo desprazámonos á Estrada o cabo de Protección Civil, Mario Antuña, e eu mesmo, como delegado de Seguridade, que recollemos o material de dotación. Desde o Concello de Cervo queremos agradecer á Xunta de Galicia o esforzo realizado para dotar ao noso Concello de traxes para combater esta praga, que cada ano aumenta considerablemente”.
O edil de Seguridade Cidadá engadiu que “a pesar de que o noso Concello é pioneiro en Galicia na loita e exterminación desta especie, pois o noso traballo ven desde o ano 2013, época na que comezou a aparecer este insecto, continuamos a colaborar cos veciños de Cervo no control desta praga. Este Concello estivo desde o inicio ao lado dos apicultores facilitando labores de información, seguimento e incluso aportando trampas para a súa captura, xa que cada raíña capturada supón un niño menos no entorno. E este ano a nosa intención, ao igual que os anteriores, é continuar con este proceso de eliminación desde o inicio da súa aparición, que adoita ser entre os meses de maio e xuño, cando nacen as primeiras avespas obreiras que son as encargadas de realizar os labores de creación das colonias. Por iso, seguindo as instrucións de persoal técnico cualificado da Xunta de Galicia débese aproveitar este período, no cal as raíñas se mostran máis activas e no exterior do niño, para proceder á súa captura”.
Soto tamén comentou que “dende o Concello de Cervo facemos un chamamento á poboación para que en caso de localizar algún niño activo se poñan en contacto co número de emerxencias 012 ou ben comunicándollo directamente ao departamento de Protección Civil do noso Concello aportando o maior número de datos posibles para a súa localización. Existe un protocolo realizado coa Consellería do Medio Rural e do Mar, da Xunta de Galicia, a través do cal se dan unhas pautas para combater esta invasión. Entre outras explícase que a trampa artesanal realizada a base de cera vella fermentada ou a cervexa negra son bos atraentes caseiros. Na trampa comercial deben verterse 125 mililitros de líquido atraente e engadir a mesma cantidade de auga. Cando o nivel do líquido baixe por efecto da evaporación pode encherse novamente con auga ata alcanzar os niveis iniciais. O líquido atraente debe renovarse cada 15 días. Outra recomendación é colocar unha trampa por cada 10 colmeas e deben instalarse a unha altura aproximada de 1,5 metros e nun radio de 100 metros ao redor das colmeas. É importante que se manteña a proporción dunha trampa cada 10 colmeas, xa que o uso excesivo de trampas pode supoñer que se capturen indiscriminadamente outras especies de insectos, producindo efectos colaterais adversos sobre o entorno e poñendo en risco a biodiversidade”.