Lugo, 30 de abril de 2016.- A presidenta do Partido Popular de Lugo e voceira do Grupo do PP na Deputación, Elena Candia, anunciou este sábado que os populares levarán ao próximo pleno da institución lucense unha iniciativa a través da que instarán á administración a que se acorde a creación dun ente provincial de turismo.
Candia explica que esta moción nace das conclusións que se obtiveron durante a mesa de traballo sobre turismo convocada pola executiva do Partido Popular da provincia de Lugo e liderada pola quiroguesa Rosa Arza (coordinadora de turismo no PP de Lugo) e polo alcalde de Sober e presidente do Consorcio de Turismo da Ribeira Sacra, Luis Fernández Guitián.
A presidenta dos populares explica que é necesario a creación deste organismo provincial de turismo co obxecto de que ampare a todos os entes vinculados co sector na provincia e, deste xeito, se podan coordinar tamén as liñas de traballo coas distintas administracións públicas. É dicir, “trataríase dun ente encargado, por exemplo, de marcar as liñas de promoción turística, de administrar os recursos turísticos de toda a provincia e mesmo de pedir as subvencións relacionadas con este sector”.
Candia asegura que esta iniciativa, deseñada en colaboración directa e estreita con representantes do sector, ten unha clara finalidade, a de darlle un pulo ao sector turístico e traballar a prol de promoción turística integral da provincia.
A maiores, durante a reunión da mesa de turismo da executiva do PP, tamén se avaliou a situación actual do sector e se estableceron outros puntos claves nos que incidir e que necesitan de actuacións inmediatas. Así, citáronse carencias na sinalización de monumentos de gran valor cultural e turístico, falouse tamén da necesidade de que haxa unha maior asistencia ás feiras internacionais de turismo, un maior contacto cos tour operadores e mesmo da importancia de crear unha marca única para a promoción dos produtos gastronómicos da provincia.
Na xuntanza dos populares tamén se defendeu a necesidade de fomentar a creación de festas de recreación histórica, así como a organización dun maior número de actividades dirixidas á xente maior, para o que se require ter máis contacto con asociacións vinculadas con este colectivo.