Arza, que se presenta acompañada dos mozos Pablo Flórez e Roberto Fernández, conseguiu, polo tanto, máis do dobre de avais do mínimo que se esixía (50 apoios) a todos os que decidisen aspirar á presidencia de Novas Xeracións do partido en Lugo.
A quiroguesa agradece os apoios recibidos “de toda a provincia” e adianta que, de ser elixida presidenta provincial, no Comité de Dirección da agrupación política xuvenil “teremos representación de todas as comarcas”.
A moza popular, que fixo entrega dos apoios á súa candidatura un día antes de que remate o prazo, dixo que teñen un calendario de traballo establecido durante a campaña, (entre o 30 e 9 de maio). Manterán xuntanzas con todas as agrupacións locais e con representantes sectoriais que afecten máis directamente á xuventude. A pretensión da candidatura integrada pola quiroguesa, polo lucense Pablo Flórez e o focense Roberto Fernández, é a de dar a coñecer as liñas do seu programa ademais de ter a oportunidade de sometelo ao consenso de afiliados e simpatizantes.
Arza dixo que “queremos seguir achegando o partido e a formación xuvenil aos mozos” sendo o “nexo de enlace” entre a mocidade e os políticos tal e como “veu facendo de xeito extraordinario a executiva saínte”. “Débolles agradecerlles o seu traballo e compromiso”, matiza.
O VIII Congreso Extraordinario Provincial de Novas Xeracións de Lugo celebrarase o 14 de maio en Monforte de Lemos e será un congreso aberto á militancia, no que cada afiliado terá o seu voto.