“A diversión non está rifada coa planificación” e “O esforzo non é o mesmo que o sufrimento” son as dúas máximas de Simón no deporte, unha afección que compatibiliza co seu traballo nunha librería, de onde tamén se nutre de infinidade de manuais sobre deporte e preparación. Seguidor das teorías de Jack Daniels para o seu adestramento, o mariñán, que se estreou nestas lides en 2012 coa Milla de Barcelona, destacou a súa rápida evolución nesta afección e os seus beneficios para a saúde: “Non tiven lesións e puiden competir no primeiro maratón xa en 2013, na Coruña. Dende que comecei a facer deporte notei unha notable melloría na miña alerxia aos ácaros; os síntomas case me desapareceron por completo”.
O burelao tamén falou da súa rutina na preparación. Actualmente realiza entre 120 e 140 km á semana, adoita correr a primeira hora da mañá para sentirse despexado o resto do día e ten o paseo marítimo de Burela como percorrido predilecto “pola zona de herba porque evito o asfalto”. Ademais incidiu na importancia de seguir o deporte para aprender, tanto dos erros dos demais coma dos mellores xestos.
Última cita no IES Monte Castelo coas Xornadas Formativas:
Xoves 2 de xuño
“A Pesca como Deporte de Elite”
IES Monte Castelo (Aula de Usos Múltiples), ás 17:00 h.
D. David Arcay Fernández (Bicampión do mundo de pesca a mosca)