Desaparece a Banda de Música de Burela despois de 26 anos de existencia

Burela, 28 de maio de 2016.- A Asociación de Amigas e Amigos da Banda de Burela anunciou este sábado a desaparición da agrupación. Fíxoo mediante unha esquela na que alude “a todos os responsables que a deixaron morrer”, xunto ás siglas dos alcaldes e concelleiros de Cultura da corporación anterior e a actual, e as do director da Escola Municipal de Música.

A asociación emite tamén o seguinte comunicado:

“Triste nova para a música en Burela. Despois de 26 anos de vida, a Banda de Música de Burela despídese dos veciños e veciñas e de todas as amizades que foi facendo ao longo destes anos de actividade. Sen dúbida, unha triste nova para Burela e para a música.

Moito ao noso pesar, desde a AABB pouco ou nada puidemos facer para remedialo. Pola nosa parte fixemos todo o que estaba nas nosas mans durante moito tempo, mais despois de varios anos de prolongada agonía, chegou o momento de despedirnos deste fermoso proxecto que nos deu tantas alegrías e satisfaccións.

Temos que dar as grazas a cada un e cada unha das integrantes que lle deron vida á Banda de Burela e a todas as persoas que dun xeito ou doutro apoiaron a nosa banda. Grazas de corazón!”