Yesenia Cao naceu en Viveiro no ano 1992, pero dende moi nova reside na localidade cervense de Rueta. Estudou Primaria no CEIP de Cervo, ESO no IES Marqués de Sargadelos e Bacharelato no IES Monte Castelo, de Burela, na modalidade de Artes. Posteriormente cursou Ilustración na Escola de Arte Pablo Picasso, da Coruña, onde obtivo o título de técnico superior en Ilustración. Ultimamente estivo traballando na Casa do Mar de San Cibrao como bolseira, e realizou deseños para diferentes proxectos.
A artista explica: “gustábame debuxar e dende moi nena souben que quería dedicarme a iso. Foi entón cara aos dez anos cando comezou a espertar en min esa vocación e o desexo de ter algún día as miñas propias obras. Ós once anos realizaba os meus primeiros lenzos, experimentando o contacto co óleo e o marabilloso mundo da pintura, unha paixón que formaría parte do meu futuro e que, de seguro, me arrastrará de por vida”.
A edil de Cultura comentou que “o Concello de Cervo aposta por todos os que queiran expoñer a súa arte aquí e especialmente polos novos creadores que se queren introducir neste mundo, como é o caso de Yesenia. Animámolos a que mostren a súa obra, xa que é unha forma de dar a coñecer os seus traballos, tanto de pintura como de escultura, fotografía, etcétera”.