O cuarteto “Non cho digo” animou coa súa música todo o percorrido que deu comezo ás cinco da tarde na Praza Maior. Neste mesmo lugar, fronte a antiga Casa Consistorial, o músico David Bellas interpretou co saxofón o Hino. Diante do edificio do Teatro Pastor Díaz, os actores Penabade, de “Volta e Dálle” e Gabriel de “Os Quinquilláns” falaron do teatro das irmandades. O “Ensemble de vento” da BMV interpretou diante da casa natal dos irmáns Vilar Ponte a “Alborada” de Veiga.
A última das intervencións estivo a cargo de Paula Naval Parapar, neta de César Parapar Sueiras, irmao da fala fusilado en Lugo en 1936 e que fixo parte da ING, xunto con Ramón Vilar Ponte e outros conveciños.