Burela, 5 de maio de 2016. A ordenanza de medio ambiente do Concello burelés establece multas que oscilan entre os 100 e os 3.000 euros para aquelas empresas ou particulares que depositen residuos fora dos lugares establecidos para ese fin.
A edil Noelia Mª Ben lembra que “as empresas teñen a obrigación de xestionar os residuos que xeran. Refírome por exemplo ás vinculadas coa construción, coa pesca, aos talleres de reparación de vehículos, etc… Eses residuos non se poden abandonar ou depositar en calquera lugar”. A concelleira de Medio Ambiente explica que “detectamos algúns vertedoiros incontrolados en diferentes puntos de Burela e imos incrementar a vixilancia e o traballo para evitar que esas situacións irregulares se sigan a producir”.
Noelia Mª Ben subliña que “a ordenanza de medio ambiente establece multas que van dos 100 euros para as infraccións leves ata os 3.000 euros para as moi graves. Queremos que a xente, os empresarios e os particulares, o teñan presente”.
A concelleira socialista sinala que “en Burela contamos cun punto limpo para a recollida de residuos domésticos de gran volume ou que son perigosos e que non deben depositarse na bolsa do lixo nin nos diferentes contedores que atopemos pola rúa. Tamén queremos incidir nesta cuestión e na necesidade de reciclar para conservar e manter do mellor xeito posible o noso entorno natural”.