Lugo, 18 de xuño de 2016. Coa instalación dunha serie de cartaces reivindicativos denunciaron os nacionalistas o mal estado da N-640 no tramo que une Lugo e Meira. A candidata por Lugo do BNG-NÓS Candidatura Galega, Olalla Rodil, acompañada de concelleiros e concelleiras do BNG dos municipios que atravesa esta estrada na comarca de Lugo, dixo que “A N-640 é o claro exemplo do abandono de Lugo por parte do goberno do estado”.
“Estamos a falar dunha estrada que é a principal comunicación entre Lugo, a Terra Chá, a Mariña e Asturias, que é responsabilidade do Ministerio de Fomento e que está totalmente abandoada” lembrou Olalla Rodil e comprometeuse a trasladar ao Congreso en Madrid as iniciativas necesarias para que o goberno do estado se faga cargo dos arranxo do firme da estrada N-640 (Lugo-Meira).
“O firme da N-640 atópase nun deficiente estado de conservación e esto pode provocar accidentes nesta estrada que asume un importante volume de tráfico” asegurou Olalla Rodil e explicou que “cando chove fórmanse bolsas de auga que se converten nun auténtico perigo para a seguridade vial”.
Para o BNG é necesario facer esta demanda dende todos os concellos que atravesa a estrada N-640 por que o seu mal estado afecta a moita xente destes concellos, da comarca e mesmo ás persoas que transitan dende Lugo cara Asturias”. Rodil lamentou o continuo abandono que o goberno do estado fai da provincia de Lugo e asegurou que existen serias dúbidas de que o propio Ministerio sexa coñecedor do estado real no que se atopa este vial a pesares “de que xa anuciaron proxectos, orzamentos, licitacións e todo tipo de tramites menos a efectivización do arranxo da estrada”.