Cervo, 20 de xullo de 2016. A comisión executiva da Federación Galega de Municipios e Provincias (FEGAMP), da que é vicepresidente primeiro o alcalde de Cervo, Alfonso Villares, reuniuse este mércores para volver tratar a necesidade de consensuar coas empresas madeireiras unha ordenanza que regule a conservación dos camiños polos que se transporta a madeira despois das talas.
Alfonso Villares salientou que “un dos asuntos que volveu outra vez á mesa da reunión foi como quedan os camiños dos distintos concellos despois das sacas de madeira nas diferentes zonas onde se está facendo unha explotación importante deste recurso”.
O vicepresidente primeiro da FEGAMP subliñou que é “un recurso que, sen dúbida ningunha, é importante para todos os concellos, para moitas familias e para moitas persoas que viven disto, pero tamén é certo que o estado no que quedan moitas das pistas por onde se saca a madeira é bastante mellorable”.
Alfonso Villares engadiu que “por iso tivo lugar onte unha reunión na que estivo a conselleira de Medio Rural, o presidente da FEGAMP e o representante da asociación Confemadera, onde se acordou sentarnos e intentar consensuar unha ordenanza que regule isto”.
O rexedor de Cervo anuncia que “tamén está previsto para a próxima semana facer outra reunión técnica, onde ademais destes representantes desta asociación estean representantes doutros colectivos, porque Confemadera foi a asociación que pediu a reunión, pero hai empresas de madeira que non están representadas por esta asociación. Polo tanto para a semana que ven vaise facer esa reunión técnica para intentar consensuar unha ordenanza entre a Xunta, os representantes da madeira e os concellos. Trátase de facer o posible para arranxar esta problemática que estamos a ter todos os concellos onde este recurso ten unha importancia, como o municipio de Cervo e o conxunto da Mariña de Lugo”.