Burela, 11 de Agosto de 2016. Para o BNG en Burela, as explicacións dadas polo señor Alfredo Llano ao respecto do curso de Xestión de Recursos Humanos foron do mais simples e non convencen a ninguén. O rexedor escudouse simplemente na falla de alumnos sen explicar as causas deste feito, que xa foran cuestionadas polo voceiro nacionalista, despois de que o Concello perdese unha subvención de case 22.500€. “Dicir que non se levou a cabo o curso por falta de alumnos é unha escusa moi pobre e demostra a ausencia total e absoluta de previsión e unha pésima xestión dos recursos públicos por parte do Goberno Municipal do PSOE”, sinalou Mario Pillado.
Como xa adiantaran desde a formación nacionalista, a escaseza de alumnos débese á prolongación do proceso no tempo, xa que ata o 26 de xullo non se convocou o tribunal para a selección dos monitores que impartirían o curso, o que fixo que moitos dos alumnos atoparan traballo senón outros cursos ou escusaran realizar un curso que lles obrigaría a recibir oito horas lectivas diarias. “O que debe explicar o alcalde é por qué se demorou tanto o proceso e se foi perdendo alumnado polo camiño, xa que a 16 de Xuño existían 12 alumnos seleccionados que non rexeitaran o mesmo” declarou Pillado, voceiro do BNG.
Aos nacionalistas non lles serven as explicacións dadas polo alcalde de Burela e pídenlle que asuma a súa responsabilidade e aclare este asunto.
Outra actitude que lle afean os nacionalistas a Llano é que que tente botar balóns fóra responsabilizando á Xunta de Galicia para xustificar este despropósito na súa xestión xa que a captación de alumnos e a selección de persoal para o curso é competencia municipal. O 25 de Maio a Xunta informou da concesión da subvención para o curso e o 2 de Xuño dende o centro de formación informaron das necesidades de selección de alumnado e persoal para o mesmo.
Ademais, dende o BNG non saben porque ante a falla de alumnos non se solicitaron mais candidatos na oficina de emprego, algo que demostra de novo a desidia do equipo de goberno. “Se prevían que se quedarían curtos de alumnado puideron facer unha nova solicitude á oficina de emprego, como fixeron noutros procesos. Semella que dende o concello de Burela, ou non tiña interese neste curso, ou non controlan a labor do persoal encargado deste tipo de trámites e procesos” finalizou Pillado.