Vento vence na primeira regata de vela tradicional XVIII Deputación de Lugo

Ribadeo, 10 de agosto de 2016. A embarcación Vento foi a vencedora na regata de vela tradicional XVIII Deputación de Lugo disputada este martes dentro das actividades da Semana Náutica Ría de Ribadeo.

Os seguintes clasificados na proba foron, por esta orde, Ras, Ivamar, Ventolín, Aquiles e La Linera.

A última das regatas incluídas no programa desta edición da Semana Náutica que organiza o Real Club Náutico de Ribadeo está prevista para este mércores, ás 17.00 horas. Será a proba de cruceiro local V Trofeo RCN de Ribadeo.

A entrega de trofeos de todas as regatas disputadas durante a XXVI Semana Náutica Ría de Ribadeo será este sábado 13 de agosto ás 20.00 horas.