O PSOE aposta por un turismo baseado na identidade cultural como elemento diferenciador

Lugo, 8 de setembro de 2016.- Os candidato autonómicos do PSdeG-PSOE pola Provincia de Lugo, Luis Álvarez e Concepción Burgo, e o Deputado Provincial da Área de Innovación, Participación Cidadá, Mocidade e Deporte, Pablo Rivera Capón, visitaron as instalacións da empresa de turismo Siente Galicia, na cidade de Lugo. Creado como un proxecto innovador por tres mulleres emprendedoras, utilizan as novas tecnoloxías para potenciar o turismo galego e crear un vínculo coa súa gastronomía e tradición, chegando a ser unha das empresas lucenses máis destacables en canto ao carácter innovador da súa proposta, así como polo seu pronto crecemento.

O candidato lucense, Luis Álvarez, trasladou o compromiso dos socialistas galegos coas políticas de emprendemento e creación de empresas, a través dun impulso e coordinación das Redes de Viveiros, Incubadoras e Aceleradoras de proxectos. “Hoxe en día, o sector turístico representa o 11% do PIB en Galicia e xera o 12% do emprego da nosa economía, polo que non se pode consentir a falta de compromiso político de Feijóo, que non foi capaz de trazar unha estratexia turística en todos estes anos, levando a cabo exclusivamente accións incoherentes e orientadas ao curto prazo”, criticou Álvarez.

Os representantes do PSdeG-PSOE afirmaron que a sustentabilidade e a innovación, de cara á mellora da competitividade e da calidade, son os dous parámetros imprescindibles para o desenvolvemento do sector turístico. “Debemos tomar como exemplo empresas como Siente Galicia, pois contribúen a posicionar a marca Galicia a través da construción dunha imaxe baseada na súa identidade cultural como elemento diferenciador”, explicou Luis Álvarez logo da conversa coas fundadoras da empresa.

Finalmente, agradeceron a implicación e acollida destas empresarias, “sen olvidar o moito traballo que fixemos e aínda temos por facer para fomentar o emprego feminino e a igualdade de oportunidades no traballo”.