Ribadeo, 19 de outubro de 2016. Alimentación e Saúde é o título da charla que organiza Acisa Ribadeo. Ofreceraa a dietista naturópata Nuria Granados este xoves ás 20.00 horas no salón de actos da antiga casa sindical, na Avenida de Galicia-20.
Nuria Granados, que falará sobre “Pautas para levar unha vida saudable a través dunha alimentación equilibrada”, asegura que na súa intervención pretende “máis que nada ter en conta como cambiou a alimentación dun tempo para aquí e ter un pouco a conciencia de que todo o que comemos basicamente agora está sobre todo moi procesado, moi azucrado, moi refinado e afástase moito do natural”.
Esta dietista explica que “a auga que bebemos tampouco é de calidade e non é fácil atopar un auga de calidade ben sexa a de grifo, a potable ou a de botella, e é moi importante tamén concienciarnos de que somos un setenta por cento de auga e temos que beber auga de calidade. Iso determina que teñamos un corpo acedo ou alcalino, que é a base da patoloxía ben sexa crónica ou sintomatoloxía variada como dores de cabeza, depresión, estreñimiento ou acidez de estómago, cousas ás que non lle damos importancia, pero que realmente non son saúde e que afectan a moitas persoas”.
Nuria Granados propón “botar unha mirada ao que era a alimentación dos nosos avós e tender un pouco cara aí, a comer un pouco máis natural, máis próximo, máis de tempada e máis de mercado, non tan envasado, tan plastificado. Son cousas moi sinxelas, tampouco fai falta facer grandes cambios senón ter conciencia un pouquiño en cousas que facemos por inercia con tanta televisión e tanto anuncio de comida”.
A dietista naturópata asegura que “queda un longo camiño que percorrer sobre todo si miramos a outros países de Europa, que como sempre nos levan a dianteira a anos luz, pero tamén é verdade que si que se vai tomando conciencia. Eu vexo de cinco anos para aquí que hai un gran cambio, cada vez hai máis tendas de alimentación ecolóxica que abren e funcionan de marabilla, cada vez hai máis grupos de consumo que se preocupan por introducir o alimento ecolóxico na súa casa, cada vez hai máis leites vegetais no supermercado, por exemplo”.
Nuria Granados engade que “si hai un cambio, si hai unha conciencia, pero hai moita xente que ten aínda a venda nos ollos porque os médicos aconsellan certa alimentación ou certas pautas que xa están como moi desfasadas, moi obsoletas, e sobre todo os medios de comunicación. Eu detéñome moito en desenmascarar publicidade enganosa en canto a industria alimentaria, á industria alimentaria interésalle o seu propio beneficio non o benestar das persoas a través da alimentación que é o que venden”.
Esta dietista considera que “agora hai moitísimas modas, o veganismo, o crudiveganismo, a dieta macrobiótica, todo iso está estupendo, pero eu non entro en dicirlle a unha persoa como ten que seguir, iso xa o deixo a elección persoal, pero si que saiban o que están facendo. Si tomas leite que saibas o que é, si tomas carne de segundo que grandes superficies que saibas o que é, eu non quero tampouco ir dicindo isto si e isto non, porque creo que non é a panacea nin que existe unha fórmula única, pero interésame moito quitarlle véndaa dos ollos á xente”.