Unha autobiografía surrealista, tenra, cómica e fantástica coa que todo o mundo acaba identificándose. Quen non se sentiu algunha vez como un imbécil?
A SANTI, o protagonista, todo lle sae mal. El procura comportarse como os demais, ten ilusión por ter un traballo como todo o mundo e casar cunha rapaza coma todo o mundo, pero sempre sucede algo que acaba deixándoo con cara de parvo.
É certo que ten unha tendencia a estar sempre nas nubes. E ás veces queda parvo mirando a ningures. E pensa: “Que fago eu aquí…coma un imbécil.”
Así que un día decide mirar atrás na súa biografía para ver de buscarlle o sentido ás cousas , e remóntase ao momento da súa concepción e aínda máis, a cando só existían un espermatozoide algo parvo e un óvulo despistado, e comeza a falalo todo desde o principio ata o preciso momento en que llo conta ao público.
A función, protagonizada por Xosé Antonio Touriñán, terá lugar o venres, 7 de outubro ás 21.30 horas, no auditorio da Casa da Cultura de Burela. A entrada, 12 euros.