Santiago de Compostela, 17 de novembro. Compromiso por Galicia non se imaxina que máis ten que pasar para que os nosos gobernantes asuman as súas políticas erradas e cambien a dirección que empobrece cada día máis ao pobo galego.
Os datos de desemprego son alarmantes, a situación dos traballadores é cada vez máis precaria e as previsións non son nada optimistas. Un estudo do BBVA confirma a inexistencia da recuperación que nos venden os gobernantes do Partido Popular.
Hai unha previsión de crecemento inferior en Galicia para o 2017, pasando do 2,8 ao 2,1%.As perspectivas de creación de emprego redúcense a metade quedando nun simbólico 1%, tendo en conta que o diferencial do paro entre Galicia e España reduciuse a metade. Os datos da débeda pública certifican unha negra realidade que se ve distinta desde as cadeiras do poder.
Agora que comenzamos novas lexislaturas en Galicia e tamén en España é preciso que se poñan as pilas e deixen de enganar á xente. Necesitamos unha total transparencia nas contas públicas para focalizar máis nas necesidades da xente. Apoio aos autónomos e as pequenas empresas, fortalecemento do sector primario, protección dos dereitos dos traballadores, loita contra a corrupción, etc…
Necesitamos unha xestión eficaz en materia sanitaria e educativa, que haxa confianza nos políticos e que se lle devolva ao pobo todo o que se lle roubou. É urxente crear un clima de dinamismo e adoptar medidas a favor dunha maioría social que vive afogada polas malas decisións dos nosos dirixentes.