Burela, 11 de xaneiro de 2017. A Delegación de Medio Ambiente do Concello pon en marcha unha campaña de compostaxe doméstica grazas á adscrición ao programa de compostaxe doméstico de Sogama. Segundo explica Noelia Mª Ben “o seu obxectivo é promover, in situ, a elaboración por parte das vivendas unifamiliares, que contan con horta e/ou xardín, dun abono natural co que substituír aos fertilizantes artificiais e cuxas propiedades nutritivas para o solo están suficientemente acreditadas”.
A edil socialista indica que “as persoas interesadas en participar neste programa de compostaxe doméstico poden dirixirse á Oficina de Medio Ambiente do Concello de Burela (situada na Praza da Mariña, nº 13, antigo edificio de Capitanía Marítima) para cumprimentar o formulario de solicitude, ou na propia Casa Consistorial. A inscrición no programa inclúe: formación específica sobre o proceso de compostaxe e entrega gratuíta dun composteiro”.
Noelia María Ben convida “a todos os veciños que dispoñan de horta ou xardín a sumarse a esta iniciativa, xa que a compostaxe doméstica ten grandes vantaxes sobre o medio ambiente, a economía e a sociedade. Non debemos esquecer que a materia orgánica representa en torno ao 40% da composición media na bolsa de lixo”.