Burela, 16 de marzo de 2017. Na sala de conferencias da antiga biblioteca a Concellería de Medio Ambiente organizou onte pola tarde unha charla sobre o uso de composteiros e a entrega dos mesmos aos 34 participantes que previamente se anotaron nesta campaña de compostaxe doméstica.
A charla foi impartida por persoal experto na materia de Sogama, asistiu a concelleira de Medio Ambiente, Noelia M.ª Ben, así como os participantes interesados na campaña que solvetaron as súas dúbidas sobre a compostaxe.
Desde a Delegación Municipal de Medio Ambiente e desde Gaia explican que “os asistentes recibiron o manual de compostaxe doméstica e recolleron os seus composteiros. Na charla explicouse que existe a posibilidade de transformar a materia orgánica en compost, un fertilizante natural con excelentes propiedades para o chan. O proceso resulta moi sinxelo, xa que se trata de recuperar unha práctica tradicional en Galicia, separando os residuos orgánicos para a elaboración de abono”.
E engadiron que “case a metade dos residuos que xeramos nos nosos fogares está formado por materia orgánica, cuxo destino habitual, son os colectores convencionais, nos que tamén deben ser depositados os materiais non reciclables”.