Segundo explica a concelleira de Medio Ambiente, Noelia Mª Ben, “nesta actividade participaron 21 rapaces dos cursos 4º ESO e 1º de Bacharelato e consistiu nunha descuberta do intermareal na zona do Perdouro. Aproveitando as horas de marea baixa a bióloga Laura Carquijero acompañou aos rapac@s explicando a biodiversidade mariña deste lugar. Inicialmente fíxose unha exposición de porqué e cómo se producen as mareas, os grupos biolóxicos máis representativos deste ecosistema mariño e as súas adaptacións a este ambiente tan cambiante. Despois, eles mesmos foron buscando diferentes organismos da zona e, por último, unha posta en común de todo o visto. Ao final da actividade os profesores do centro propuxeron unha limpeza na zona areosa, retirándose algunhas bolsas de refugallos”.
Noelia Mª Ben destacou que “os obxectivos destas actividades son dar a coñecer a riqueza biolóxica do intermareal rochosa da zona de Burela, diferenciar os diferentes grupos de organismos que habitan esta zona (moluscos, poríferos, crustáceos, peixes, etc), fomentar a capacidade de observación e busca e, por último, concienciar e sensibilizar sobre o problema da contaminación antrópica nas zonas costeiras”.