Llano manifestou que “desde a Mancomunidade a nosa pretensión é darlle valor a todo canto temos aquí na Mariña en todos os aspectos. Estamos potenciando o turismo, as infraestruturas, e tamén nos parece moi importante promocionar a información e divulgación dos conventos e mosteiros da comarca”.
O presidente da Mancomunidade salientou que “existe gran variedade de mosteiros e conventos que lle dan un valor singular á nosa comarca. Poden ser o Mosteiro de San Salvador de Lourenzá, o Mosteiro de Santa María do Campo de Ribadeo, a Basílica de San Martiño de Mondoñedo en Foz, o Convento de Valdeflores de Viveiro ou o Mosteiro de San Miguel de O Vicedo”.
Alfredo Llano declarou que “nosoutros queremos dar oportunidade a aquela xente que sexa estudosa ou que dalgún xeito lle poida interesar o tema do patrimonio como poden ser estes mosteiros polo seu valor histórico, artístico, social, cultural ou relixioso. Penso que é unha boa oportunidade para que se acheguen e gocen da comarca da Mariña e ao mesmo tempo poidan apreciar estes mosteiros e conventos”.
O presidente da Mancomunidade manifestou que “agora se vai facer unha distribución en todos os concellos da Mariña. Imos facer sobre 2.000 dípticos para poder informar a toda aquela xente que teña preocupación por este tema. Penso que é unha boa iniciativa. Antonio Niñe, que é o seu autor, fixo un bo traballo que nosoutros valoramos. Tamén queremos, a través deste medio, difundir este tema que pode ser moi atractivo, moi valorado e desde logo que é moi singular aquí na Mariña”.