“Isto supón que melloramos as súas condicións salariais con respecto ao convenio do seu sector que é o de instalacións deportivas e ximnasios. Este implica 6 euros por hora e nos establecemos 15 euros por hora”, destacou.
Serán case 8.000 horas de actividades dirixidas a asociacións de todos os Concellos da provincia con menos de 5.000 habitantes, ou a colectivos con capacidades diferentes ou en risco de exclusión social dos 67 municipios.
O Titular Provincial apuntou que “queremos deste xeito e como vimos facemos, favorecer o rural da provincia e a igualdade de oportunidades, dentro da nosa aposta por unha Deputación coas persoas, rural e social”.
No Movémonos poderán participar máis de 80 colectivos aos que o Goberno Provincial financia, na súa totalidade, clases de ximnasia ou mantemento, entre outras. É dicir, as accións terán custe cero para os seus participantes. O ano pasado, participaron outras tantas asociacións con 1.300 veciños.
Melloras en dotacións públicas
A Xunta de Goberno aprobou novas obras de mellora en dúas estradas provinciais no Concello de Ribas de Sil. Son o acondicionamento dun treito de case 900 metros na LU-P-5301; e de 350 metros na LU-P-5303.
Actualmente, o Goberno da Deputación está a arranxar a LU-P-5303. De feito, estas novas obras poden facerse grazas ás melloras presentadas pola adxudicataria, que permiten completar o arranxo da LU-P-5303, de San Clodio por Torbeo; e acondicionar un treito da LU-P-5301. O orzamento destes novos traballos inclúese dentro dos case 360.000 euros, que xa achegamos ás obras que estamos a executar na LU-P-5303.
A Xunta de Goberno aprobou a ampliación do prazo de execución de obras no Concello de Mondoñedo a petición deste municipio. Trátanse dos traballos de rehabilitación da casa museo de Álvaro Cunqueiro, que contan con 308.000 euros da Deputación.