Campos Conde subliñou que “o obxectivo deste evento é reunir por primeira vez na tempada a todos os equipos da provincia de categoría infantil, alevín e benxamín. Ademais, como novidade nesta edición incluímos a categoría de babybasket, polo que serán uns 500 nenos e nenas de entre 7 e 14 anos, gozando dunha xornada deportiva e de convivencia sen precedentes na presente tempada. Con esta iniciativa, fomentamos o baloncesto base lucense e promovemos hábitos de vida saudables entre os mozos, da man dun dos clubs femininos de referencia na cidade de Lugo como é o Club Baloncesto Ensino”.
Pola súa banda, Méndez López asegurou que “o deporte é fundamental”, ao tempo que lembraba que así o ten demostrado o Concello, tanto nos distintos exercicios orzamentarios, pola partida que se destina para o mesmo, máis de 3 millóns; pola cantidade de disciplinas que se practican no municipio, e polas instalacións municipais coas que conta a veciñanza luguesa. Así mesmo, amosou o compromiso do Goberno Local co deporte base e os valores que inculca esta práctica, e felicitou á Deputación por levar a cabo este torneo.
Homenaxe
A competición renderá homenaxe a Fernando Fernández Allende, un dos pioneiros do baloncesto feminino na provincia de Lugo e promotor deste deporte entre os mozos lucenses. Ademais de ser adestrador de baloncesto, foi profesor na Facultade de Ciencias da Educación Física de A Coruña e un dos fundadores do CB Ensino.
Sistema de competición
O evento reunirá a 10 equipos de categoría babybasket mixto, 11 equipos de categoría benxamín mixto, 7 equipos de categoría alevín feminino, 8 equipos de categoría alevín masculino ou mixto, 5 equipos de categoría infantil feminino e 7 equipos de categoría infantil masculino. En canto a duración dos encontros, será a seguinte:
– Na categoría baby serán 6 períodos de 6 minutos a tempo corrido con 1 minuto de descanso en cada cuarto. Terán 5 minutos de quecemento previo ao encontro na pista de xogo.
– En categoría benxamín e alevín serán 6 períodos de 8 minutos a tempo corrido con 1 minuto de descanso en cada cuarto. Terán 5 minutos de quecemento previo ao encontro na pista de xogo.
– En categoría infantil serán 4 períodos de 10 minutos a tempo corrido con 1 minuto de descanso en cada cuarto e parado os 2 últimos do cuarto. Terán 5 minutos de quecemento previo ao encontro na pista de xogo.