A edil nacionalista subliñou que “foron máis de 50.000 tapas as servidas nos 52 establecementos participantes durante estes nove días do tapeo. En canto ao ambiente que se viviu en Ribadeo, Rinlo e San Xillao, onde estaban os establecementos participantes, foi do máis concorrido”.
Ana Martínez dixo que “todo isto estivo animado por diferentes actividades, que creo que tiveron un reforzo moi importante coa segunda edición dos Cantos de Taberna que fixeron durante a tardiña noite do venres 19 que Ribadeo fervese musicalmente falando. Os 50 músicos máis todos os que os acompañaron cantando polos diferentes establecementos fixeron unha tarde moi agradable. Penso que estes Cantos de Taberna son algo máis que un mero concurso e forman parte xa da identidade do propio Ribadeo de Tapeo”.
A concelleira de Turismo cre que “pouco máis se pode pedir dun cóctel tan proveitoso, falamos de música, de gastronomía, e sobre todo do bo facer dos hostaleiros e das hostaleiras participantes, que realmente son os verdadeiros artífices desta gastrofesta e aos que tamén quero agradecer a súa colaboración e participación. Poñer de manifesto o esforzo e o traballo que supón servir preto de 50.000 tapas durante nove días, nalgúns momentos moi apurados, onde ademais a infraestrutura para poder realizar isto dunha maneira áxil e rápida as veces non é a máis adecuada. Temos que dicir que grazas a eles isto segue sendo un éxito”.
Ana Martínez lembrou que “hoxe aínda eles son os protagonistas do peche do Ribadeo de Tapeo, porque unha vintena de cociñeiros destes establecementos participarán na selección que o xurado profesional realizará a partires das cinco e media da tarde no hotel restaurante Voar. Vai ser en aberto para o público e convido a que a xente que se queira achegar a esta selección do xurado asista. Estaremos encantados de que a sala do Voar tamén estea ben concorrida”.
A edil ribadense explicou que “estes hostaleiros e hostaleiras presentarán as tapas aos cinco membros do xurado no que se atopan cociñeiros, expertos e críticos gastronómicos relevantes. Este xurado será o que ao final da noite declarará o primeiro, o segundo e o terceiro premio do Ribadeo de Tapeo 2017 xunto coa Tapa de Ribadeo”.
Ana Martínez quixo recordar tamén que “nos vindeiros días, cando xa se reconten os votos das furnas que estiveron depositadas nos diferentes establecementos, tamén se darán a coñecer outros dous premios importantes que son o premio do Público e o premio á Mellor Barra, que son os que elixe a xente que durante todos estes días estivemos probando as tapas polos diferentes establecementos”.
A concelleira de Turismo engadiu que “este ano haberá unha novidade en canto á entrega de premios, xa que a realizaremos en aberto. Será o 3 de xuño, no Cine Teatro, e alí participarán os que nos deleitaron durante a tardiña do venres, os protagonistas dos Cantos de Taberna. Así pois o día 3 volveremos poder escoitar os Cantos de Taberna do Ribadeo de Tapeo, no transcurso da entrega de premios desta tradicional cita gastronómica no noso concello”.