Campos Conde e Candia López supervisaron algunhas das actuacións financiadas, comezando pola rehabilitación do casa do escritor Álvaro Cunqueiro. Trátase dun inmoble privado, que foi cedido temporalmente ao Concello e para o que os veciños demandan a súa titularidade pública para o seu desfrute, pois estase a arranxar con fondos públicos. O conxunto das obras de remodelación contan cun total de 308.000 euros provinciais, que se distribúen en varias anualidades. No 2016, foron 170.000 os achegados polo Goberno da Deputación.
Melloras no rural
A continuación, o Presidente e a Alcaldesa comprobaron o resultado dos traballos executados en accesos viarios a 8 núcleos rurais de 5 parroquias: Masma, Arco, Ferrería, O Casa, Couto da Recadieira, Tronceda, Estelo e Lousada. Son actuacións financiadas polo Executivo Provincial con case 50.000 euros, que benefician de xeito directo aos 300 veciños que viven en ditas localidades.
O titular provincial e a rexedora tamén supervisaron o resultado das melloras levadas a cabo nos alumeados públicos de 5 barrios, os de Coruxeiras, Pelourín, Avenida Eladio Lorenzo, Seivane e Couto de Outeiro. O Goberno da Deputación financiou con máis de 20.300 euros a dotación de puntos de luz de baixo consumo. Este novo equipamento reducirá nun 80% a factura da luz anual, supoñendo un aforro de máis de 7.000 euros ás arcas municipais; ao tempo que contribúe á mellora deste servizo público aos 250 veciños que viven en ditas zonas.
O Goberno da Deputación investiu en Mondoñedo outros 87.700 euros na mellora de servizos públicos en zonais rurais, favorecendo a actividade agrogandeira. Con este investimento, recuperáronse terras abandonadas, creáronse invernadoiros, melloráronse accesos públicos, arraxáronse traídas de auga e restauráronse centros sociais, que tamén foron equipados con dito investimento.
Servizos Sociais
O Goberno da Deputación atende a 84 maiores de Mondoñedo aos que a Xunta non presta esta atención profesional. O Executivo Provincial faino a través do Servizo a Domicilio a non dependentes, que financia con 21.700 euros e que permite a asistencia de 67 veciños; así como coa Teleasistencia gratuíta, da que dispoñen outros 17 veciños deste municipio con limitacións en canto a súa autonomía.
Emprego
O Executivo Provincial financia con case 42.000 euros os custos laborais pola contratación de 4 desempregados lucenses que reforzan as prestacións públicas municipais a través do DEPUEMPREGO, o plan de emprego do Goberno da Deputación nos Concellos de menos de 20.000 habitantes. Grazas a este plan, en Mondoñedo traballa unha educadora familiar de apoio ao departamento de Xuventude para labores vencelladas á prevención de drogodependencia e de utilización responsable das redes sociais; un axente de desenvolvemento turístico que atende a Oficina de Turismo da cidade; un peón para reforzar o servizo de acondicionamento das rúas do casco histórico; e un axudante de animador cultural e deportivo, que apoie ao técnico de deportes co que conta o Consistorio.
Impulso do turismo
O Goberno Provincial fixo que a Deputación continúe sendo a principal promotora e impulsora de citas punteiras en Mondoñedo, como as Feiras da San Lucas, considerada unha das citas de gando cabalar máis antiga de Europa; e o Mercado Medieval, que reúne a milleiros de persoas; así como de recursos turísticos, como as Covas do Rei Cintolo. O Executivo Provincial achegou á celebración da 25 edición do Mercado Medieval 32.000 euros; ás Feiras das San Lucas outros 25.000 euros; e 20.000 á posta en valor das Covas do Rei Cintolo, supoñendo un total de 77.000 euros.
Pulo á cultura e ao deporte
Foron outros 26.300 euros os que o Goberno da Deputación achegou aos veciños de Mondoñedo para dinamizar socialmente ao Concello con actividades culturais e deportivas. Por exemplo, dende a súa creación, o organismo provincial financia en solitario con 6.000 euros os premios de poesía Leiras Pulpeiro e Díaz Jácome. O Executivo Provincial colabora co tecido deportivo mindoniense con axudas que superaron os 18.000 euros no 2016.