FOZ a 29 de Maio de 2017. Os concelleiros de “Foz, plataforma de futuro” mostran a súa satisfación pola aprobación das tres mocións presentadas e debatidas no pleno do mes de maio DO CONCELLO DE FOZ.
-Instar ó Concello de Foz ó pintado e sinalización da rúa que une o cemiterio e a igrexa en Vilaronte.
-Instar á Xunta de Galicia a mellorar para o ano 2018 a renda de inclusión social de Galicia (RISGA).
-Instar ó Concello de Foz ó adecentamento da Rúa Pena Parda en Marzán.
Este pasado xoves 25, ven de celebrarse o pleno da corporación municipal do mes de maio do concello de Foz. Un pleno no que as tres mocións que “Foz, Plataforma de Futuro” presentou para o seu debate e aprobación, foron aprobadas cos votos favorables de toda a oposición e a abstención do equipo de Goberno.
No punto número 3 da orde do día figuraba a proposta de FPF de “Instar ó Concello de Foz ó pintado e sinalización da rúa que une o cemiterio e a igrexa en Vilaronte”. Na parroquia de Vilaronte, nos últimos tempos, fíxose unha obra moi importante como foi o aceso a esta parroquia pola estrada do cemiterio. Con anterioridade abrírase a estrada que ven dende a igrexa ata o cemiterio e mais fixéronse as beirarrúas. Sen embargo na última reunión da Asociación de veciños e consumidores de Vilaronte había novas propostas para mellorar esta zona, e que nos foron transmitidas os membros de “Foz, Plataforma de Futuro”. Como amosamos nunha foto que acompañaba a esta moción, podíase observar que a sinalización vertical que hai para sinalizar a entrada desta parroquia pode ser mellorada considerablemente. Así mesmo reivindícase por parte dos veciños e veciñas que se pinten os carrís da rúa do cemiterio e mais a rúa do atrio, así como que se pinte a zona de aparcamento na rúa do atrio e se sinalice para evitar o desorde que alí se produce. Ó mesmo tempo os veciños que transitan esta estrada quéixanse, que hai un cruce moi perigoso nesta estrada, concretamente o cruce que enlaza coa rúa que vai cara o Centro Social do Castro por falla de visibilidade, e o ser tan estreita para facer o xiro cara o cemiterio hai que meterse á cuneta, que cada vez é mais fondo o furado que alí se vai facendo.
Instamos ó Equipo de Goberno a:
– Mellorar a sinalización vertical que hai na estrada xeral que vai dende o cruce dos Camioneros dirección ferreira nos dous sentidos.
– Pintado dos carrís da estrada do cemiterio e estrada do atrio, así como o pintado dos aparcadoiros nesta última estrada para acabar co desorde que alí se produce.
– Mellora do cruce que enlaza a estrada do cemiterio coa estrada que vai dirección ó Centro social do Castro.
Esta moción foi aprobada cos votos favorables de toda a oposición e a abstención do Equipo de Goberno do PP.
No punto número 4 da orde do día figuraba a proposta de FPF para “Instar á Xunta de Galicia a mellorar para o ano 2018 a renda de inclusión social de Galicia”. A crise consolidou en Galiza un modelo que afondou nas desigualdades e na exclusión social: aumentaron os niveis e a duración do desemprego, aumentou a precariedade laboral e reducíronse os ingresos por fogar.
A taxa de risco de pobreza e exclusión chegaba en 2015 case ao 26% e a porcentaxe de persoas en exclusión material severa era do 4,2%, tendo aumentado durante a crise. O risco de pobreza e exclusión social é meirande entre familias monoparentais (53%), mocidade de 16 a 29 anos (36,4%) e menores de 16 anos (35,4%) – datos de 2014 -.
Se a pobreza severa afectaba en 2015 a 132.000 persoas, a RISGA foi percibida ese mesmo ano por 3.848 persoas (datos do Ministerio de Sanidade, Servizos Sociais e Igualdade).
Ademais, a RISGA é unha das rendas máis baixas do Estado (399 €/mes) e con menor cobertura (4,4 persoas beneficiarias por cada 1000 habitantes).
O 1 de xaneiro de 2014 entraba en vigor a lei 10/2013, do 27 de novembro, de Inclusión Social de Galicia, que modificaba a anterior da RISGA. Malia o aprobado na disposición derradeira da lei – “a Xunta de Galicia, nun prazo máximo de seis meses desde a publicación desta lei, elaborará as disposicións necesarias para o seu desenvolvemento e aplicación” – , actualmente non se dispón dun decreto que a desenvolva. A falta de decreto regulador da lei provocou e provoca unha xestión opaca e restritiva da prestación: atrasos na tramitación, falta de criterios homoxéneos, control e burocratización excesiva, etc., que redundan nun afastamento das persoas en exclusión social do sistema.
Pola súa insuficiente contía, pola excesiva burocracia, pola falta de desenvolvemento dos tramos de inserción e transición ao emprego ou polos criterios restritivos na concesión da RISGA, esta renda amósase como unha ferramenta que non garante a inclusión social.
Instamos á Xunta de Galicia a:
1. Elevar en 2018 a dotación da RISGA, co obxectivo de igualala, canto menos, á media do conxunto do Estado.
2. Impulsar, antes do remate do ano 2018, a publicación do Decreto que desenvolva a Lei 10/2013, de 27 de novembro, de Inclusión Social de Galicia, de xeito dialogado cos sindicatos e coas asociacións e entidades que traballan sobre a pobreza e exclusión social.
3. Regular, no devandito decreto, os tramos de inserción e transición ao emprego.
4. Aumentar os Orzamentos da Consellería de Política Social en 2018 para garantir orzamento suficiente para o desenvolvemento da Lei de Inclusión Social.
Esta moción foi aprobada cos votos favorables de toda a oposición e a abstención do equipo de goberno do PP.
– No punto número 5 da orde do día figuraba a proposta de FPF para “Instar ó Concello de Foz ó adecentamento da Rúa Pena Parda en Marzán”. No barrio de Marzán, temos a rúa Pena Parda, que vai dende a Avda. de Viveiro ata a rúa que sube o Obispo Santo. Esta ten a particularidade de ser a vía de aceso ó apeadeiro de FEVE, estación esta usada pola maioría de persoas que utilizan este medio de comunicación para vir e marchar do noso pobo, así como, sobre todo a xuventude en temporada estival. Nos últimos tempos veciños e veciñas desta zoa nos transmitiron o seu malestar polo estado desta rúa no seu firme, así como pola falta de limpeza das cunetas, o que provoca que se acelere a degradación do firme desta rúa.
Instamos ó equipo de Goberno a:
-Instar ó Equipo de Goberno Municipal a adecentar o firme da Rúa Pena Parda, no barrio de Marzán, dende a Avda. de Viveiro ata a estrada que sube ó Bispo Santo.
-Instar ó Equipo de Goberno Municipal á limpeza de cunetas e tubos de entradas ás fincas para que as augas transcorran por ditas cunetas e non invadan a calzada.
Esta moción foi aprobada cos votos favorables de toda a oposición e a abstención do Equipo de Goberno do PP.
-No punto número 9 da orde do día figuraba a proposta do BNG para “solicitar o mantemento das liñas de transporte público por estrada”.Esta proposta levaba aparellados dous acordos que debía tomar o Pleno, por unha banda
-“Que o Concello de Foz se comprometera a colaborar economicamente para garantir a continuidade do servizo de transporte por estrada”, e por outra banda
-“Que o Concello de Foz esixa da Xunta de Galicia e da Consellería de transporte unha solución alternativa á supresión de liñas de transporte por estrada”.
Os Concelleiros de “Foz, Plataforma de Futuro” propuxemos unha emenda a esta petición do BNG e pedimos votar por separado estes dous puntos. A emenda foi aprobada cos votos favorables de toda a corporación, agás o BNG. A nosa formación por un lado está totalmente a favor de que se manteña o servizo público como ata a data ou inclusive se mellore todo o posible, como así o fixemos saber no Pleno e votamos a favor de que a Xunta de Galicia a través da Consellería de transporte de solución a este problema, xa que ten todas as competencias nel.
Pero votamos en contra de que sexa a conta das arcas municipais, é dicir, a conta dos veciños e veciñas do noso Concello, quen sufraguen as perdas da empresa privada que xestiona este servizo como pedía o BNG.
Votamos en contra por varios motivos:
-primeiro porque temos coñecemento de primeira man, que si a empresa que hoxe en día está levando o servizo deixa de xestionalo, hai empresas interesadas en collelo,
-en segundo lugar porque é competencia totalmente da Xunta de Galicia,
-en terceiro lugar porque inda que o concello de Foz aportara unha cantidade económica para sufragar estes gastos, hai moitos mais concellos que se aproveitan deste servizo tamén e non teñen porque pagar os veciños e veciñas de Foz e os de outros Concellos non,
-e o último motivo para votar en contra, é que o Concello de Foz non pode axudar a salvar o servizo que presta unha empresa privada con diñeiro público, porque seguro que hai mais empresas que prestan servizos públicos dentro do noso Concello que habería tamén que aportarlles diñeiro entón.