A finalidade é coñecer mellor e delimitar dun xeito máis preciso o xacemento arqueolóxico que permita aportar a información necesaria para axustar definitivamente á súa área de protección, e tamén, en función dos resultados obtidos, favorecer a súa futura posta en valor.
O lugar coñecido como “Os Castros”, na parroquia da Nosa Señora dos Remedios do concello lucense de Mondoñedo, localízase nun pequeno outeiro entre os ríos Cesuras e Valiñadares, ao noroeste do núcleo urbano de Mondoñedo, desde onde se divisa practicamente toda a vila e cuxos terreos están dedicados na actualidade a hortas, praderías e parcelas con arboredo e maleza.
Este lugar, identificado como castro da Idade do Ferro no inventario de xacementos arqueolóxicos depositado na Consellería de Cultura, atópase incluído no Catálogo do Patrimonio Cultural de Galicia, dado que forma parte do catálogo de bens culturais do Plan Xeral de Ordenación Municipal (PXOM) do concello de Mondoñedo.
A historia das investigacións sobre este lugar redúcense á inclusión do mesmo en diversos catálogos xa desde o século XIX, non habendo constancia de que se teñan levado a cabo ningún tipo de intervención arqueolóxica nel. As súas características topográficas, nun outeiro que presenta varios socalcos e desde o cal se ten un control visual de todo o val de Mondoñedo, con intervisibilidade con outros castros da contorna, fai que sexa, a priori unha localización factible para un castro da Idade do Ferro.