Parou en Carballo para tomar un café, preto do centro, sabía que por alí pasaban todas as novas de Bergantiños. Puxo a orella nun grupo de donas que viñan de facer receitas, información entrecortada, todo o mundo falaba do suceso de Coristanco, pero o inspector non quería que o seu traballo fora coñecido, aínda non, por iso non preguntou. O señor da boina falaba rápido con acento de Malpica, cona que difícil de entender, só escoitou claro: tellado, golpe e cancela. Pouco era, pero tiña algo para comezar.
Chegou á tarde á praza do Concello, case choca con un tractor que ía cheo de patacas, que terra rica está pensou. Fixouse na xente e percibiu rostros de preocupación, case de malestar, a típica cara de estar pasando un momento pouco agradábel, poucos entendían o suceso, non é grato estar en todas as conversas do País, aínda que non sexa directamente.
Todo apuntaba a un accidente, a esas cousas de carácter persoal, a un triste episodio que so o tempo fai que se esqueza. Foi falando con veciños, foi tomando pulso; cada vez vía máis clara e importante a pista de Carballo: tellado, golpe e cancela. Preto das 7 da tarde tiña xa o seu atestado, colleu o coche e foi cara a Coruña, aínda chegaba a ver o Depor, que sorte. Sentouse no escritorio da comisaria e redactou a nota para o Xefe:
ATESTADO INFORME:
A finada naceu en maio, non foi un parto fácil. Non estaba claro o Pai. por decisión da maioría elixiron de titor a un tal Amancio. Pero por capricho de algún, o de menos votos, querían cambiar este titor. Para tal decisión era necesaria a intervención das familias de Santiago. Logo de xuntanzas e conspiracións actuaron, co seguinte resultado:
En Coristanco alguén deu un golpe a Dona Democracia, esta esvarou polo Tellado (mollado de indiferenza) e bateu de morte contra a Cancela pechada. En definitiva DEMOCRACIA foi asasinada en Coristanco por unha man oculta coa acción pasiva dun tellado e dunha cancela, actores pasivos pero necesarios. As maiores vítimas os veciños e veciñas.
COMPRE INVESTIGAR.