Continúan en Alfoz as actividades de outono con sesión de contacontos e magosto

Alfoz, 3 de novembro de 2017. Este sábado en Alfoz continúan as actividades de outono. Desta volta ás 20:00 horas no salón de actos do Centro Sociocultural chega desde o concello veciño de Abadín Ángeles Goás que nos deleitará cunha sesión de contos para adultos chamada “O medo é libre”. Tal e como apunta a narradora “ os contos recollidos nesta sesión son historias de vida que nos falan dos medos que conviven con nós no día a día, que nos moven ou nos paralizan. Aínda así eles non teñan a última palabra, porque o medo é libre, si…, pero nós podemos decidir que grao de liberdade queremos darlle”.
A continuación, a partir das 21:30, no polideportivo municipal celebrarase un magosto en colaboración coa ACX O Castelo, con cena, animadores e hinchables para os nenos, actuación do dúo Merengue e, como non, castañas. O menú da cea estará composto por xamón cocido, callos, costela asada con crema de castaña, tarta de Santiago e castañas asadas. O prexo será de 20 € para os socios da ACX O Castelo e 23 € para o público en xeral. Tamén haberá menú infantil ao prezo de 10 €. Os tickets estarán á venta ata hoxe venres podendo solicitalos no número de teléfono 677 308 552, na casa do Concello, no Restaurente o Frenazo e na Peluquería Marité.