O seu presidente, Álvaro Doural, explica que “desde hai uns días temos con nós en Ribadeo a Jere Back, alumno finlandés de FP do centro Luksia, de Lohja. Está a realizar unha estadía formativa dun mes de duración en Talleres Maseda, unha empresa que rexenta a familia Maseda, o pai e os seus dous fillos”. Jere Back expresoulle o seu agradecemento a Talleres Maseda e a Apaga por facilitarlle esta experiencia formativa, que lle permitiu tamén visitar varias empresas da comarca como Hermanos Rega, en Alfoz, ou a Recense, na Pontenova.
Doural engade que “no 2018 está previsto que máis alumnos doutros países viaxen a Ribadeo e a outros concellos da Mariña lucense, dentro deste Plan de Internacionalización de Apaga”.
Impulso á empregabilidade
Por outra banda, cinco alumnos de grao medio de FP do centro CIFP Profesor Raúl Vázquez, de Madrid, están a realizar un mes de prácticas en tres empresas de Alemaña e nunha de Italia. “Deste xeito Apaga afianza a súa rede europea coa incorporación de novas empresas que permitirán a alumnos de FP realizar estancias formativas noutros países”, subliña Álvaro Doural, presidente da Asociación de Profesores de Automoción de Galicia.