Balseiro deu conta da decisión da Consellería de Cultura, Educación e Ordenación Universitaria de incorporar este centro no Plan de Rehabilitación Integral de edificios educativos e explicou os pasos a seguir que farán posible a execución material das obras xa no ano próximo.
O delegado territorial dixo que esta actuación tan ambiciosa, reportará maior confortabilidade aos escolares e a todos os usuarios, así como unha mellora substancial da eficiencia enerxética do centro, que contribuirá tamén á redución considerable dos custes de mantemento, polo menor consumo de luz e calefacción.
De feito entre as actuacións previstas se inclúe a inxección de material na cámara de aire das fachadas, cambio das fiestras e carpintería exterior e persianas, colocación de falsos teitos e introdución de tecnoloxía led nas luminarias. Ademais, de xeito complementario executarse o pintado interior do centro e, previsiblemente a reforma dos aseos.
Na súa visita, Balseiro estivo acompañado polo director do centro, Manuel Rodríguez González, representantes do claustro de profesores e da Corporación municipal. Na actualidade, o CEP Lois Tobío acolle a un total de 308 alumnos de primaria, repartidos en 17 grupos.
Balseiro salientou que, que “a Xunta quere fomentar o uso racional da enerxía e predica co exemplo”, impulsando a óptima xestión dos recursos enerxéticos nos seus propios centros. “Constatamos que este tipo de melloras teñen consecuencia directa no benestar dos usuarios e no aforro en gastos correntes, pero ademais, dende unha perspectiva máis ampla, é indispensable avanzar neste camiño cara un desenvolvemento sostible e á concienciación e sensibilización dos máis pequenos na importancia do coidado do medio ambiente”.
Novas oportunidades de emprego
O delegado tamén explicou que o proxecto definitivo será o que deseñe un dos 47 arquitectos novos convidados polo Goberno galego a presentar as súas propostas, xa que logo o departamento educativo da Xunta dá continuidade ao seu compromiso coa empregabilidade das persoas máis novas, facilitando ademais que poidan incorporar esta experiencia ao seu currículo.